Cadw anifeiliaid yn ddiogel ac yn hapus mewn tywydd cynnes

Wrth i'r tymheredd godi, mae'n hanfodol gofalu am ein ffrindiau blewog a phluog. P'un a ydych yn ffermwr, yn berchennog ceffyl, yn gludwr, yn berchennog anifeiliaid anwes, neu'n rhywun sy'n caru anifeiliaid, dyma rai awgrymiadau diddorol a hawdd eu dilyn i sicrhau eu lles yn ystod tywydd eithafol.

Tywydd poeth: curo'r gwres

Gall tywydd poeth fod yn anodd i anifeiliaid. Gall tymheredd uchel, lleithder a newidiadau sydyn yn y tywydd achosi bygythiadau mawr. Mae gwahanol anifeiliaid yn delio â gwres mewn gwahanol ffyrdd, felly dyma beth sydd angen i chi ei wybod:

Anifeiliaid anwes: cadwch eich ffrindiau blewog yn oer ac yn gyfforddus

Mae angen sylw arbennig ar eich anifeiliaid anwes yn ystod tywydd poeth hefyd. Dyma sut i'w cadw'n ddiogel:

Hydradu.

• Gwnewch yn siŵr fod gan eich anifeiliaid anwes ddŵr ffres bob amser. Rhowch nifer o bowlenni o amgylch y tŷ a'r iard.

• Pan fyddwch allan, dewch â photel ddŵr gludadwy a bowlen i'ch ci.

Cysgod ac Ardaloedd Oer

• Gwnewch yn siwr fod gan anifeiliaid anwes ardaloedd cysgodol, yn enwedig os ydynt yn treulio llawer o amser yn yr awyr agored. Gall coed, canopïau, neu gytiau cŵn wedi'u hawyru'n dda roi cysgod angenrheidiol o'r haul.

• oOs yw'ch anifeiliaid anwes y tu mewn, cadwch yr amgylchedd yn oer gyda gwyntyllwyr neu dymherwyr. Gall lloriau teils hefyd fod yn lle gwych iddynt orwedd ac oeri.

Cyfyngu ar Ymarfer Corff

• Cerddwch eich anifeiliaid anwes yn gynnar yn y bore neu'n hwyr gyda'r nos pan fydd y tymheredd yn oerach. Osgoi gweithgareddau egnïol yn ystod rhannau poethaf y dydd.

• Cadwch lygad ar eich anifeiliaid anwes yn ystod teithiau cerdded ac amser chwarae. Os ydyn nhw'n ymddangos yn flinedig, cymerwch egwyl, a chynnig dŵr.

Peidiwch byth â gadael anifeiliaid anwes mewn car

• dPeidiwch byth â gadael eich ci mewn car wedi'i barcio, hyd yn oed am ychydig funudau. Gall tymheredd y tu mewn i geir godi'n gyflym, gan arwain at strôc gwres neu hyd yn oed farwolaeth.

Mwynhau bod yn oer a chwarae dŵr

• Cynigiwch giwbiau iâ i'ch anifeiliaid anwes neu ddanteithion diogel i anifeiliaid anwes wedi'u rhewi i'w helpu i oeri.

• Gadewch i'ch anifeiliaid anwes sblasio o gwmpas mewn pwll plant bas neu osod chwistrellwr iddynt chwarae ynddo. Goruchwyliwch chwarae dŵr bob amser er mwyn sicrhau diogelwch.

Brwsio

• Brwsiwch eich anifeiliaid anwes yn rheolaidd i gael gwared â ffwr rhydd, a all eu helpu i gadw'n oer. Fodd bynnag, peidiwch a'u heillio i lawr i'r croen gan fod eu cot yn rhoi amddiffyniad rhag yr haul.

• Os oes gan eich anifeiliaid anwes ffwr hir, ystyriwch ei dorri ychydig i'w helpu i gadw'n oer, ond ymgynghorwch â thriniwr proffesiynol i sicrhau ei fod yn cael ei wneud yn ddiogel.

Gwyliwch am arwyddion o straen gwres

• Byddwch yn ofalus o anadlu gormodol, glafoerio, syrthni, curiad calon cyflym, neu chwydu. Gall y rhain fod yn arwyddion o straen gwres neu drawiad gwres.

• Os sylwch ar y symptomau hyn, symudwch eich anifail anwes i ardal oerach ar unwaith, cynigiwch ddŵr ac ymgynghorwch â'ch milfeddyg os yw'r symptomau'n parhau.

Creu amgylchedd oer

• Buddsoddi mewn matiau neu badiau oeri wedi'u cynllunio ar gyfer anifeiliaid anwes. Gall rhain ddarparu arwyneb oer iddynt orwedd arno.

• Rhowch dyweli gwlyb ar y llawr i'ch anifeiliaid anwes orwedd arnynt, neu eu sychu i lawr gyda lliain llaith i helpu i ostwng tymheredd eu corff.

Gofal cyffredinol anifeiliaid fferm

• Rhowch gysgod a digon o ddŵr ffres bob amser. Mae hyn yn arbennig o bwysig i anifeiliaid cnoi cil fel gwartheg a defaid, sy'n cynhyrchu gwres mewnol o dreulio ac sy'n methu dibynnu ar chwysu i oeri. Mae moch hefyd yn ei chael hi'n anodd oeri, gan na allant chwysu'n effeithiol.

• Archwiliwch eich anifeiliaid yn aml, gan ganolbwyntio ar y rhai ifanc iawn neu hen.

• Dysgwch arwyddion straen gwres, sy'n amrywio rhwng rhywogaethau, a gweithredu'n gyflym trwy ddarparu cysgod a dŵr.

• Ceisiwch osgoi symud anifeiliaid yn ystod cyfnodau poethaf y dydd. Dylid godro gwartheg llaeth yn agos at eu hardaloedd gorffwys.

• Gweithio gyda chymdogion os yw cyflenwadau dŵr a bwyd anifeiliaid yn mynd yn brin neu fod mynediad yn anodd.

 Cludo anifeiliaid mewn tywydd poeth

Mae cludo anifeiliaid mewn tywydd poeth yn gofyn am ofal ychwanegol i atal anaf neu ddioddefaint:

• Bod yr anifeiliaid yn ffit i deithio.

• Ceisiwch osgoi cludo anifeiliaid mewn tymheredd dros 30°C oni bai bod gennych gerbyd a'r tymheredd wedi'i reoli. Gwiriwch y tymheredd 'teimlo fel' ar gyfer y daith.

• Sicrhau bod yr holl systemau dyfrio ac awyru yn y cerbyd yn gweithio'n iawn.

• Rhowch ddigon o ddŵr i ddiwallu anghenion yr anifeiliaid.

• Cadwch deithiau mor fyr â phosibl a chael cynllun wrth gefn ar gyfer oedi.

• Cludwch anifeiliaid yn ystod y nos, gyda'r nos neu'n gynnar yn y bore er mwyn osgoi gwres oriau brig.

• Lleihau dwysedd llwytho i wella llif aer ac atal gorboethi.

 Sychder: Parhau i Hydradu

Yn ystod sychder, mae dŵr yn hanfodol:

• Sicrhau bod gan anifeiliaid fynediad at gyflenwad dŵr addas a darparu dŵr yfed ffres bob dydd. Mae anifeiliaid ifanc, dan do ac sy'n llaethu mewn mwy o berygl o ddadhydradu.

• Cael cynllun os oes tarfu ar gyflenwadau dŵr a nodi ffynonellau amgen. Symudwch anifeiliaid i'r man lle mae dŵr ar gael os oes angen.

• Gweithio gyda chymdogion i sicrhau cyflenwad dŵr cyson.

• Os oes amheuaeth, gofynnwch am gyngor ar unwaith gan eich milfeddyg. Ystyriwch symud neu werthu anifeiliaid i leihau dwysedd stocio os oes angen.

Dogni dŵr

Os oes angen dogni dŵr, bodloni'r isafswm dyddiol hyn:

• Gwartheg godro: 38 i 52 litr

• Gwartheg eraill: 38 litr

• Ceffylau: 20 i 45 litr

• Moch: 4 i 11.5 litr

• Defaid: 6 litr

• Dofednod (dwys): 0.5 litr

Trafodwch gyda'ch milfeddyg sut i leihau anghenion dŵr, fel rhoi llai o fwyd neu roi diwedd ar gynhyrchu wyau. Byddwch yn ofalus i osgoi gwenwyn halen mewn moch.

Gall tywydd eithafol fod yn heriol, ond gyda'r paratoa'r gofal cywir, gallwch sicrhau bod eich anifeiliaid yn aros yn ddiogel ac yn iach. Byddwch yn wyliadwrus, gweithiwch gyda'ch cymuned, a cheisiwch gyngor milfeddygol bob amser pan fo angen.

I gael rhagor o wybodaeth am ddiogelu eich anifeiliaid ac i wirio eich perygl o lifogydd, ewch i Cyfoeth Naturiol Cymru a chofrestrwch am rybuddion llifogydd