Trafnidiaeth gyhoeddus

Os ydych yn gyrru i rywle fel arfer, archwiliwch os gallwch ddefnyddio trafnidiaeth gyhoeddus yn lle hynny am un daith yr wythnos. A oes bws neu drên y gallwch ei gymryd i’r gwaith? A oes taith fyrrach y gallwch ei cherdded, beicio neu olwynio yn lle hynny?  Darganfyddwch a yw eich cyflogwr yn annog staff i ddefnyddio trafnidiaeth gyhoeddus, gyda chynllun benthyciad ar gyfer tocyn tymor, er enghraifft. Os yw hygyrchedd yn hanfodol, gwiriwch a fydd eich opsiynau trafnidiaeth gyhoeddus lleol yn gweithio i chi.  

Cyn teithio, gwiriwch amserlenni er mwyn dod o hyd i’r ffordd fwyaf cyfleus a chyflym o gyrraedd pen y daith.

Gall apiau a gwefannau ar eich ffôn clyfar, megis ap Trafnidiaeth Cymru, eich helpu i gael yr wybodaeth ddiweddaraf am eich taith ac osgoi unrhyw oedi neu newidiadau. Yn ogystal â hynny, gallwch chwilio’n hawdd am amserlenni a dod o hyd i’r llwybrau a’r cysylltiadau gorau pan fyddwch ar eich ffordd. 

Archwiliwch wahanol opsiynau tocynnau, oherwydd mae’n bosibl y cewch docynnau rhatach drwy eu prynu ar-lein. A ydych chi’n defnyddio’r bws neu’r trên yn rheolaidd? Chwiliwch a ydych yn gymwys i gael pàs teithio neu gerdyn rheilffordd sy’n cynnig prisiau rhatach i fyfyrwyr, pobl dros 65 oed neu deuluoedd.

Cerddwch, olwynwch, sgwterwch neu feiciwch yn lle defnyddio'ch car ar gyfer teithiau byrrach, er enghraifft i'r bws neu'r orsaf drenau. Yna teithiwch bellteroedd hirach ar drafnidiaeth gyhoeddus. 

Mae’r amgylchedd yn elwa mewn sawl ffordd os defnyddiwch drafnidiaeth gyhoeddus, er engraifft mae llai o geir yn helpu i leihau llygredd a gwella ansawdd yr aer. 

Gallwch gerdded, olwynio neu feicio i’r orsaf fysiau a theithio ymhellach ar drafnidiaeth gyhoeddus i’ch cadw’n heini. Bydd defnyddio trafnidiaeth gyhoeddus hefyd yn eich galluogi i ymlacio ac osgoi’r straen o yrru sy’n fuddiol i’ch lles meddyliol.

Gall bysiau a threnau fod yn ffordd wych o osgoi tagfeydd yn ystod oriau brig – diolch i lonydd bysiau a threnau cyflym. Yn ogystal â hynny, gallwch dreulio amser gwerthfawr gyda’ch plant, eich cydweithwyr neu ar eich pen eich hun, yn cymdeithasu, yn gweithio neu’n gwrando ar gerddoriaeth.

Gall trafnidiaeth gyhoeddus fod yn rhatach na defnyddio’ch car eich hun, yn enwedig os ydych yn teithio ar eich pen eich hun, gan na fydd rhaid i chi wario ar danwydd, parcio na chostau cynnal a chadw.

Mae bysiau a threnau’n aml yn mynd â chi i ganol tref neu ddinas fel y gallwch neidio oddi arnynt a bod yn union le mae angen i chi fod, heb orfod dod o hyd i le parcio na thalu amdano.