Dewisiadau teithio gwyrdd

Beth mae Cymru’n ei wneud?

Mae Cymru am gynyddu cyfran y teithiau a wneir trwy ddulliau llesol 33% erbyn 2030 a’r gyfran ar drafnidiaeth gyhoeddus 7% erbyn 2030. Er mwyn cyflawni hyn, mae’r Llywodraeth yn gwneud dulliau llesol o deithio yn ddiogel ac yn fwy hygyrch, gan annog pawb i ddewis dulliau amgen gwyrdd o deithio.  

Mae Llywodraeth Cymru hefyd yn cymryd camau i:   

• Wella trafnidiaeth gyhoeddus  

  Mae Trafnidiaeth Cymru yn gweithio i greu system drafnidiaeth gyhoeddus effeithlon a fforddiadwy. Bydd y prosiectau Metro yng ngogledd a de Cymru yn creu rhwydwaith o fysiau, trenau a theithio llesol, felly bydd yn haws cysylltu a theithio mewn modd cynaliadwy. Ym mis Mawrth 2023 cyflwynwyd trenau cyntaf Metro De Cymru. 

• Gwneud gorsafoedd rheilffyrdd yn wyrddach  

  Mae prosiect Llwybrau Gwyrdd Trafnidiaeth Cymru yn gwella’r amgylchedd naturiol mewn 25 gorsaf reilffordd yng Nghymru, gan greu gofodau gwyrdd a gwella bioamrywiaeth.  

• Buddsoddi mewn teithio llesol 

  Buddsoddodd Llywodraeth Cymru £75m yn 2021-22 mewn llwybrau a chyfleusterau teithio llesol i helpu awdurdodau lleol i greu rhwydwaith o lwybrau beicio a cherdded newydd a gwell yng Nghymru. Mae’r rhain yn cynnwys rhwydweithiau ardaloedd cyfan o draciau beicio gwell, mwy diogel – wedi’u gwahanu’n ffisegol oddi wrth draffig, gan gynnwys rhwydweithiau sy’n cysylltu pentrefi â threfi mewn ardaloedd gwledig. Mae hwn yn brosiect cyfredol, ac mae’r Llywodraeth yn parhau i fuddsoddi mewn teithio llesol i ddarparu llwybrau ychwanegol i gwmpasu hyd yn oed mwy o ardaloedd y wlad.  

  
  Mae awdurdodau lleol a chyrff gwasanaethau cyhoeddus eraill ledled Cymru hefyd yn cynnig cynlluniau llogi e-feiciau (fel y fenter ranbarthol hon) a benthyg e-feiciau (er enghraifft E-Symud ar gyfer rhai sy’n byw yn Aberystwyth, Rhyl, Y Barri, Abertawe, Y Drenewydd a’r ardaloedd cyfagos) 

• Hyrwyddo’r rhwydwaith cymdeithasol go iawn  

  Nod y rhwydwaith cymdeithasol go iawn yw ysbrydoli pobl i deithio’n fwy cynaliadwy pan fyddant yn cwrdd â ffrindiau, yn teithio am resymau hamdden neu’n dychwelyd i’r gwaith.  

• Cyflwyno bysiau trydan 

  Bellach gallwch ddefnyddio bysiau trydan ar gyfer llwybr T1 TrawsCymru rhwng Caerfyrddin ac Aberystwyth. Mae Bws Caerdydd wedi bod yn cyflwyno fflyd o fysiau trydan di-allyriadau i’n prifddinas sy’n golygu gwell ansawdd aer a ffyrdd tawelach.  

• Moderneiddio gwasanaethau tacsi  

  Mae’r Llywodraeth yn gweithio ar wneud gwasanaethau tacsi yng Nghymru yn fwy diogel, yn wyrddach ac yn fwy teg.  

• Cynyddu’r nifer sy’n manteisio ar geir a faniau di-allyriadau 

  Mae Llywodraeth Cymru yn cefnogi’r cynlluniau i roi terfyn ar werthu ceir a faniau petrol a diesel newydd o 2030, ac i bob car a fan newydd fod yn ddi-allyriadau erbyn 2035. 

• Buddsoddi mewn seilwaith gwefru ar gyfer cerbydau trydan 

  Mae’r seilwaith gwefru ar gyfer cerbydau trydan yn cael ei ehangu i ganiatáu mynediad haws i bob un ohonom. Mae dros £20m eisoes wedi’i fuddsoddi mewn gwefru ar gyfer cerbydau trydan. 

• Adolygu prosiectau ffyrdd 

  Fydd Llywodraeth Cymru ond yn buddsoddi mewn ffyrdd ar gyfer prosiectau sy’n lleihau allyriadau carbon, cefnogi newid i drafnidiaeth gyhoeddus, cerdded a beicio, gwella diogelwch a helpu ymaddasu i effeithiau newid hinsawdd. 

• Terfyn cyflymder 20mya  

  Bydd Llywodraeth Cymru yn cyflwyno terfyn cyflymder 20mya ledled Cymru ar ffyrdd mewn ardaloedd preswyl a strydoedd sy’n brysur â cherddwyr. Er bod hyn yn cael ei gyflwyno i greu cymunedau mwy diogel ac iachach, mae hefyd yn helpu yn y frwydr yn erbyn newid hinsawdd. Un o’i nodau yw annog mwy o bobl i gerdded a beicio, er mwyn lleihau allyriadau carbon. 

• Cyflwyno Bil yr Amgylchedd (Ansawdd Aer a Seinweddau) (Cymru) 

  Mae hyn yn nodi ffyrdd o wella ansawdd yr amgylchedd aer yng Nghymru, a fydd yn helpu i leihau effaith allyriadau niweidiol ar ein hiechyd, economi, natur a bioamrywiaeth. 

• Annog gweithio o bell  

  Anogir gweithio o bell neu weithio’n agos i gartref, lle bo hynny’n bosibl, er mwyn lleihau traffig.  

• Lleihau allyriadau awyrennau 

  Mae Llywodraeth y DU yn dwyn ymlaen gynigion i gynyddu effeithlonrwydd tanwydd mewn awyrennau, datblygu awyrennau di-allyriadau a chyflymu’r cyflenwad a’r defnydd o danwydd awyrennau cynaliadwy.  

• Annog teithio llesol i'r ysgol

  Darganfyddwch sut mae Iechyd Cyhoeddus Cymru yn annog teithio llesol i'r ysgol a darganfyddwch sut y gallwch chi gymryd rhan yn Rhaglen Teithio Llesol Ysgolion Sustrans.

Rhagor o wybodaeth

Am fwy o wybodaeth ar fanteision trafnidiaeth werdd ac ar sut y gall helpu i leihau eich ôl troed carbon, archwiliwch yr adnoddau hyn.

• Mae Cyngor Sir Gâr yn esbonio manteision cerdded i’r ysgol a syniadau i’ch rhoi ar ben ffordd. 

• Cerbydau Trydan – Dysgwch fwy am fanteision cerbydau trydan. 

• Llai o Deithiau Awyr – Darllenwch am deithiau awyr a’u heffaith ar yr amgylchedd. 

• Mapiau Rhwydwaith Teithio Llesol - Rhestr o lwybrau teithio llesol wedi’u cymeradwyo’n llawn.  

• Y prosiectau Metro – prosiectau Metro yng ngogledd a de Cymru i’w gwneud hi’n haws i chi deithio ar drên, bws, beic neu ar droed.  

• Bysiau trydan – Dysgwch ragor am fysiau trydan di-allyriadau yng Nghymru.  

• Canllaw gyrru’n effeithlon yr Ymddiriedolaeth Arbed Ynni. 

• Mae’r Green Journal yn awgrymu ffyrdd o gymudo mewn modd mwy ecogyfeillgar. 

• Mae’r cynllun Llwybrau Gwyrdd yn creu gorsafoedd rheilffyrdd gwyrddach. 

• Dysgwch fwy am gynllun llogi e-feiciau Cyngor Bro Morgannwg. 

• Meddyliwch yn wahanol am drafnidiaeth gyhoeddus gyda’r rhwydwaith cymdeithasol go iawn. 

• Gallwch gael cymorth a chyngor i’ch helpu chi gyda’r costau byw cynyddol.