Storio ac oes silff

Mae dyddiadau ‘Defnyddio erbyn’ yn ymwneud â diogelwch, sy’n golygu na ddylech fyth fwyta bwyd ar ôl y dyddiad hwnnw, tra bod dyddiadau ‘ar ei orau cyn’ yn ymwneud ag ansawdd – sy’n golygu y gallai’r bwyd fod yn ddiogel i’w fwyta ar ôl y dyddiad sydd ar y cynnyrch, ond efallai na fydd ar ei orau. Ond a yw’r dyddiadau ‘defnyddio erbyn’ ac ‘ar ei orau cyn’ yn gywir? Mae’n dibynnu. Os yw’r bwyd wedi’i rewi, bydd yn fwytadwy am fwy o amser (gwnewch yn siŵr eich bod yn ei ddadmer yn drylwyr cyn ei fwyta). Os ydych yn cadw bwyd yn yr oergell, dilynwch gyfarwyddiadau storio’r bwyd. Darganfyddwch fwy am labelu dyddiadau bwyd. 

Ydych chi wedi rhoi cynnig ar y dull ‘cyntaf i mewn – cyntaf allan’ (FIFO)? Gwiriwch labeli’r cynnyrch cyn eu storio nhw yn eich cypyrddau, oergell a rhewgell. Symudwch y bwydydd hŷn i flaen eich silffoedd fel y gallwch eu defnyddio yn gyntaf. Bydd hyn yn eich helpu i ddefnyddio eich bwyd cyn iddo ddod i ben ac i gadw eich cegin yn drefnus. Archwiliwch fwy o awgrymiadau i wneud i'ch bwyd fynd ymhellach.

Mae cynwysyddion aerglos yn atal ocsigen rhag difetha'r bwyd, yn cadw ei ffresni ac yn rhwystro lleithder a all achosi llwydni.

Bara yw un o'r cynhwysion sy'n cael ei wastraffu fwyaf - mae cartrefi'r DU yn taflu 20 miliwn o dafelli bob dydd. Mae yna lawer o ffyrdd o’i ddefnyddio, ei droi’n friwsion bara, yn groutons neu ei storio yn y rhewgell am hyd at chwe mis. Gall piclo, eplesu neu eu troi’n gyffeithiau hefyd ymestyn bywyd eich ffrwythau a’ch llysiau. Archwiliwch fwy o syniadau am fwyta’n gynaliadwy.

Gwiriwch pa fwyd sydd gennych yn eich cypyrddau ac yn eich oergell. Gwnewch restr siopa o'r cynhwysion sydd eu hangen arnoch cyn i chi fynd i'r siop er mwyn osgoi prynu unrhyw beth sydd gennych eisoes neu nad oes ei angen arnoch. Bydd hyn yn eich helpu i gadw rheolaeth ar eich siopa ac yn golygu y byddwch yn fwy tebygol o ddefnyddio’ch bwyd cyn na ellir ei fwyta mwyach.

Gwnewch yn siŵr fod tymheredd eich oergell yn is na 5^oC er mwyn cadw bwyd yn ffres am hirach ac atal twf bacteria niweidiol – Mae gan Hoffi Bwyd Casáu Gwastraff ganllaw i’ch helpu i wirio hyn. Hefyd ceisiwch gadw eich silffoedd yn drefnus a pheidiwch â’u gorlwytho, er mwyn sicrhau bod yr aer yn gallu cylchredeg yn rhydd a bod y tymheredd yn aros yn gyson.

Teimlo’n euog am daflu bwyd neu eisiau helpu rhywun arall gan ddefnyddio cynhwysion na allan nhw’u defnhyddio? Defnyddiwch apiau fel Olio sy’n ein galluogi ni, siopau lleol a busnesau bwyd i rannu bwyd sydd dros ben. Mae Neighbourly a FareShare Go hefyd yn gweithio gydag elusennau bwyd a grwpiau cymunedol i ailddosbarthu bwyd sydd dros ben a chynhyrchion eraill i bobl sydd mewn angen. Dewch o hyd i grwpiau ailddosbarthu arall yma.

Dilynwch y cyfarwyddiadau storio i ymestyn oes silff cynnyrch. Bydd hyn yn rhoi mwy o amser i chi fwyta bwyd cyn iddo fynd yn ddrwg, a all helpu i atal difetha a gwastraffu bwyd.

Gall rhai bwydydd gynnwys bacteria a all achosi gwenwyn bwyd os nad ydyn nhw’n cael eu storio ar y tymheredd cywir. Mae'n hanfodol deall labelu dyddiadau a'r gwahaniaeth rhwng dyddiad ‘ar ei orau cyn’ a dyddiad ‘defnyddio erbyn’. 

Storiwch eich bwyd yn gywir er mwyn iddo gadw ei flas a’i ansawdd – bydd hyn yn gwneud eich prydau bwyd yn fwy pleserus a’u cadw nhw o’r bin.

Yn ôl WRAP, mae dros ddwy ran o dair gwastraff bwyd y cartref yn fwyd y gellid bod wedi’i fwyta. Amcangyfrifir bod hyn werth tua £60 y mis, neu £700 y flwyddyn, i deulu cyffredin gyda phlant. Mae gwastraffu llai o fwyd yn arbed arian i ni.

Rydyn ni’n dueddol o daflu bwyd dros ben a sbarion, sy’n arwain at wastraff diangen. Mae dim ond prynu’r hyn sydd ei angen arnom a defnyddio’r hyn rydyn ni wedi’i brynu yn lleihau gwastraff bwyd. Trwy ailgylchu neu gompostio bwyd anfwytadwy, gallwn helpu i leihau allyriadau nwyon tŷ gwydr.

Mae prynu llai a pheidio â gwastraffu cymaint o fwyd bwytadwy yn lleihau’r allyriadau carbon niweidiol sy'n deillio o'i gynhyrchu.